السلام عليكم ورحمة الله وبركاته...
زوجوني
نزلت هذه الكلمات مثل الصاعقة على الأم
كانت صدمة لها
مع أن المفروض أن كل أم تفرح لما تسمع هالكلمة من واحد من عيالها
لكن سبب الصدمة كان أن هالكلمة ما صدرت من ولدها
لكنها صدرت من .... من
من " بنتها " ؟؟؟
إيه " بنتها "
و اللـه النشبة
أنربط لسان الأم
دارت فيها الدنيا قامت تهوجس
الولد نقدر نخطب له ... لكن البنت بنبلش بها
من وين بنجيب لها رجل !!!!!
" يـمه ... ردي علي .. تكفين ... زوجيني "
صحت الأم من الهواجيس الساخنة ... القاتلة ...اللي أصابتها من الصعقة السابقة
كانت البنت تهز كتف أمها .. و تترجى فيها
" يـمه ... أفهميني ... أنا أبي أعـرس ... "
لكن الأم ما قدرت ترد بأي كلمة
كانت بس تناظر في عيون بنتها و تقول بينها و بين نفسها
" هذي اللحظة إلي ما عملت حسابها .... الظاهر بنتي كبرت و أنا ما أدري ... "
رجعت البنت و رمت بنفسها على الكرسي بكل إحباط و قالت :
" أنتم ليش ما تبون تفهموني .. أنا خلاص كبرت ... صرت حرمه .. عمري الحين
فوق العشرين سنة .. يعني حرمه .... أفهميني يـمه الله يـخـلـيـك "
أخيراً تكلمت الأم و قالت :
" خلاص يا بنيتي ... فهمتك " ... و هي قاعدة تفكر وشلون تبي تفاتح الأبو في
هالموضوع ... والله هاذي الـمصيبة
قربت البنت من أمها و قالت
" يـمـه و شهـو اللي خلاص ... أنتي تحسبيني الين الحين بزر ... بتصرفيني ؟؟ .. أنا
حرمه .. أنا الحين صرت حرمه .. و كل صديقاتي اللي معي تزوجوا ... يمه الله يخليك
حسي بشعوري "
و الأم مسكينة يتقطع قلبها على بنيتها .. و تقول في خاطرها
" الله يعينك يا بنيتي .. كل هذا في قلبك و متحملتة "
و البنت استمرت في صراحتها ...
" يمه أنتي أكيد تعرفين مشاعر أي بنت في عمري .. و أنا ما طلبت شيء خطاء ..
طلبت العرس بس .. "
و هوجست الأم
" العرس بس !! .. إيه هين بس .. هو العرس ينقال عنه بس ؟؟ !! "
و كملت البنت :
" يمه سامحيني على صراحتي
بس ما لي غيرك أفضفض له
أنتي لو تعرفين شلون إحساسي كلما فكرت في صديقاتي المتزوجات
أتخيل سعادتهم ... و أتصور شعورهم
فاهمتني يمه ؟؟؟ "
و قفت الأم في مكانها .. و حاولت إنها تكون صارمه عشان تنهي الحوار و قالت :
" خلاص يا بنت .. قلت لك خلاص ..
أنا فهمت و ماله داعي كل هالشرح
و إذا جاء أبوك تفاهمت معه ... أنتي تحسبين الموضوع سهل ..
بينجلط الرجال فيها "
قامت البنت من مكانها .. و واجهت أمها و قالت :
" لا .. ما بعد فهمتيني .. و لا حسيتي باللي أحسه
أنتي عايشه في نعيم .. أنا أشوفك كل يوم تروحين مع أبوي .. و أنا محرومة من
هالشيء ..
تحسبيني ما أفهم .. ما أحس
أعرف شعورك لما تكونين مع الوالد "
و مسكت كتوف أمها بين إيديها و حطت عينها بعين أمها و قالت :
" يمـه أفهمي ليش أنا أبي أتزوج .. "
الأم ما قدرت و دارت و جهها عن بنتها و قالت :
" يا بنت أستحي "
لكن البنت كملت كلامها :
" يـمـه المسألة ما فيها حياء .. هذي مـشاعر طبيعية ..
كله كوم .. و منظر صديقاتي كوم ..
كل يوم أشوفهم الصباح يـجيبونهم أزواجهم للكلية
و أنا قلبي يتفطر
أشوف أشكالهم مع رجالهم .. و أنـقـهـر ..
و أنا كل يوم أركب مع السواق للـكلية
يمه أنا كلي أحاسـيـس و مـشاعـر
يمه أفهـميني عاد "
لكن الأم ما استحملت
طاحت على الأرض مـغـمـى عليها
و الظاهر إنها إنجلطت ..
جلست البنت على ركبتيها .. جنب أمها .. تحاول إنها تصحيها و هي تصرخ :
" يـمـه أفهمـيـنـي ... أنا .... أنا .... أنا ....
أنــا أبــي أتــزوج عشــــــــــــــان ..
عشان أبـي أركـب قـــــــدام " ؟؟؟؟؟ !!!!!!!!! نشا اله عجبتكم القصصة